मारकुस न माण्डि परभु ईसु मसीह की छोखी खबर

मारकुस नाऊँ का परभु ईसु मसीह की सेवा करबाळा न य्हो सास्‍त्र माण्डियो छ।ई सुं ई सास्‍त्र को नाऊँ “मारकुस न माण्डि परभु ईसु मसीह की छोखी खबर”छ। ई सास्‍त्र मं परभु ईसु मसीह का जीवन,उपदेस अर ऊँका चमतकारां क बारां मं माण्डिया छ।अर ईसु मसीह परम प्रधान परमेस्वर को बेटो छ,ऊ ई दुनिया मं परमेस्वर की ईच्चा पूरती करबा काण आयो छ अर उन्ह मनख्यां सुँ घणो प्रेम कर्यो अर व्हांकी सेवा बी करी छी।ईसु मसीह मनख्यां क तांई सेवकाई करबा काण अर व्हांन व्हांका पापां सुं छुडाबा काण ई दुनिया मं आया छ,व्ह ई दुनिया मं रहया फेर व्हांनॅ मनख्यां का पाप क लेख घणा दुख उठा'र कुरुस प मरग्या फेर पाछा जीवता होग्या।ई सास्‍त्र मं ईसु मसीह बेमार मनख्यां को छोखा करबो अर भुतां न मनख्यां मं सुँ खाढ़बो अर मनख्यां का खोटा-गुणा न माफ करबो फेर बी ई सास्‍त्र मं बत्तिसमा देबाळा यूहन्ना क बारां मं अर ईसु मसीह का बत्तिस्मा क बारां मं अर ऊंका सेवा क बारां मं अर यहुद्‌यां का सरदारां सुं ईसु मसीह का बरोध अर ईसु मसीह को मरबो अर पाछा जीन्दो होबा क बारां मं अस्यांकी घणी सारी बातां माण्डि छ,थें ई सास्‍त्र न छोखा ध्यान सुं पढ़लिज्यो अर परभु ईसु मसीह प बस्वास करलिज्यो अर परभु ईसु मसीह क नांई थें बी मनख्यां क तांई सेवा करज्यो।

छोखी खबर को चालु होबो- 1:1-13
 

गलील मं ईसु की लोग-दणीयां काण सेवा करबो 1:14—-9:50
 

गलील सुँ यरुसलेम तांई जात्रा 10:1-52
 

यरुसलेम मं आखरी दनां 11:1—15:47
 

ईसु मसीह को मरया होया मं सुं पाछा जीवता होबो 16:1-8
 

ईसु मसीह जीवता होबा क बाद मं दिखाई देबो अर सोर्ग(स्वर्ग) मं जाबो 16:9-20
 

¹ ईसु मसीह ज्ये परमेस्वर को बेटो छ।उँकॅ बारा मं छोखी खबर अस्यां चालु होई । ² जस्यां ईसु मसीह क बारा मं यसाया नाऊँ का परमेस्वर की भवीष्यबाणी खबाळा न घणा साल क पहली माण्ड दी छी।

“झांक,म्हूँ ,म्हारा खबरी न थारॅ पहली खन्नारियो छूँ ,क कस्यां ऊ थां आबा काण गडार त्यार करॅगो”

³ जंगळ मं एक हेलो पाड्‌बाळा की या बात सुणाई दे री छ। क”परभु काण गडार त्यार करो,अर ऊंकॅ लेखॅ गेला न छोखा करो”

⁴ तो यूहन्ना ज्ये ^*बत्तीस्मा देतो आयो छो।अर जंगळ मं ऊ मनख्यां काण बत्तिस्मा देतो देतो या बात प्रचार करबा लाग्यो,क थें अपणा मन न पाप का गेला सुँ बदल्यो अर बत्तिस्मा लेल्यो।जिसुँ परमेस्वर थांकां पाप न धो देगा। ⁵ यहूदीयां ईलाका का घणा लोग-दणी अर यरोसलेमं नगरी का घणा लोग-दणी ऊंकॅ घोड्‌यां ग्या।अर व्हानॅ खुद न अपणा अपणा पाप मानल्या।जिसुँ ऊ व्हांकॅ काण एरदन नंदी मं बत्तीस्मा द्‌यो। ⁶ अर यूहन्ना ऊंटडा का बाळां सुँ बणायां लत्ता फर्या छो।अर डूण्डी प चामडा को पट्टो बांध्या रह्' छो।अर ऊ टिड्डीयां अर जंगळी म्हूआळ को रस खावॅ छो। ⁷ अर यूहन्ना, लोग-दणीयां मं यो प्रचार कर्यो छो, क म्हारॅ बाद मं एक मनख आबाळो छ ज्ये म्हॅ सुं घणो शकतीसाली छ।अर म्हूँ थाँ सुँ खर्यो छूँ,क म्हूँ ऊंका मुड्डा का फीत्ता बी खोल बा क लायक कोंई न्ह छूँ। ⁸ म्हूँ तो, थांकॅ तांई पाणी सुं बत्तीस्मा^† देरियो छूँ,पण व्ह थांकतांई अपणी पबीत्र आतमा सुं बत्तीस्मा देऊगो”

⁹ जी दनां मं एक दन,ईसु गलील ईलाका का नासरत नाऊँ का एक गाँव सूं आया। अर ऊंठी एरदन नंदी मं उनॅ यूहन्ना सूं बत्तीस्मो ल्यो ¹⁰ जद व्ह पाणी मं सूं बाहरॅ खड'र उपर आरिया छा।तो एकदम उनॅ स्वर्ग(स्वरग) फाटतो देख्यो ।अर पबीत्र आतमा कबूत्रा क रूप मं अपणॅ उपर उतर तो दिख्यो। ¹¹ अर ऊ बगत स्वर्ग मं सूं आकासबाणी होई,”तू म्हारो लाड्लो बेटो छ, म्हूँ था सूं घणो राजी छूं”। ¹² ईकॅ बाद मं पबीत्र आतमा ईसु न हात्योहाथ जंगळ मं खन्नाया। ¹³ ईसु ऊंठी चाळीस दनां तांई जंगळ मं र्‌यो।ऊंठी सेतान ईसु सुँ पाप करवाबा कांण परीक्षा लेतो र्‌यो।अर व्ह ऊंठी जंगळी ज्यानबरां क लारां र्‌यो। अर स्वर्ग दूत ऊंकी सेवा-चाकरी करता रह'या।

¹⁴ बत्तीसमो देबाळा यूहन्ना न पकड्‌'र काळ-कोटरी मं बुजबा क पाछॅ ईसु गलील का इलाका मं जा'र परमेस्वर की छोखी खबर न लोग-दणीयां क तांई बताबा लाग्या। ¹⁵ ईसु न खी,समय पूरा होग्या छ।अर परमेस्वर का राज गोड़ॅ आग्या छ ।ई लेखॅ थें पाप क गेला सुँ मन बदल्यो। अर परमेस्वर की छोखी खबर प बस्वास करो। ¹⁶ एक दन, जद ईसु गलील की झील क कराडॅ- कराड़ॅ जार्या छा, व्हांनॅ समोन अर समोन को भाई अन्द्रियास मछ्छीयां पकड्बा क तांई झील मं ज्याळ पटकतो देख्यो,क कस्यां व बोई(मछवारा) छा। ¹⁷ अर ईसु न वा सूं खी,”म्हारॅ पाछॅ आजाओ अर म्हारा चेला बणजाओ।तो थां जस्यां अबाणु मछ्छीयां पकड्बाळा छ,अस्यां म्हूँ थांनॅ परमेस्वर क तांई मनख्यां न लाबाळा बणाऊं।” ¹⁸ हात्युहाथ व अपणी ज्याळ न छोड्'र ईसु क पाछॅ चालदर्या। ¹⁹ व्हांनॅ जातां-जातां थोड़ा सांक आगॅ,ईसु न जबदी का बेटा याकूब अर ऊंको भाई यूहन्ना दिख्यो,व नाव मं ज्याळ सुळ जारिया छा। ²⁰ ईसु न व दिखतांई खी,”चालो,महारा चेला होजाओ” तो व हात्युहाथ ऊंका भाईजी ज़बदी न म्हॅन्थीयां क लारां नाव प छोड़'र ईसु क पाछ होग्या।

²¹ फेर ऊँठी सुँ ईसु अर ऊंका लारां का मनख कफरनहूम नाऊँ का एक सहर मं ग्या। जद यहूदीयां को आराम हाळो दन आयो,तो बेग साक ईसु यहूदीयां की भेळा होबाळी सभा क घर मं जा'र परमेस्वर की छोखी खबर सखाबा लाग्या। ²² तो सारा मनख ईसु का उपदेश न सुण'र सोच मं पड़ग्या ।क कस्यां व्ह अस्यां सखार्यो छो जिंकॅ घोड्यां घणो अधीकार रह छो।पण व्हाँनॅ यहूदीयां का निम सखाबाळा क नाईं न्ह सखार्यो छो ²³ उ बगत मं,यहूदीयां की भेळा होबाळी सभा क घर मं एक मनख छो जिंकॅ भूत लागरीयो छो। ²⁴ उनॅ बार्हां पाड़'र खी,हे ईसु नासरत गांव मं रह्बाळा,थारो म्हं सूं कांई काम छ? कांई थां महाँनॅ नास करबा काण आया छ क? म्हूँ जाणु छूँ,,क थां कुण छ? थां परमेस्वर को पबित्र बेटो छ । ²⁵ पण ईसु न उ भूत सुं दब्कार खी,तु छानो रह्,ई मनख मं सुं खढ़ जा। ²⁶ फेर भूत उ मनख न झझोड'र जोर सुँ बार्हां पाड़तो उ मनख मं सुं खड़ग्यो। ²⁷ तो ऊंठी भेळा होया सारा मनख सोच मं पड़ग्या।अर अपणा-आप बुझबा लाग्या,अर या कांई बात छ?,यो तो नयो उपदेस छ!अर व्ह अधीकार सुँ भूतां न बी मनख्यां मं सुं खड़जाबाको हुकम देवॅ छ,अर व बी ऊंकी बात मान लेवॅ छ। ²⁸ तो ज्ये काम ईसु न कर्या ,उंकी खबर गलील ईलाका अर ऊंका आस-पास का सारा गांवा मं झट सुं फॅलगी।

²⁹ फेर ईसु अर ऊंका साथीड़ा यहूदीयां की भेळा होबाळी सभा क घर सुं खड़'र,याकुब अर यूहन्ना क लारां समोन अर अन्द्रीयास क घराँ आग्या। ³⁰ तो व्हाँई समोन की सासु बुखार सुं बीमार हो'र खाट प पडी छी,ईं लेखॅ ऊंकॅ बारा मं व ईसु सुं जद की जद बताया। ³¹ फेर ईसु घर क मॅलाड़ी ऊंकॅ गोड़यां जा'र ऊंको हाथ पकड़'र व्हांनॅ ऊठाई अर ऊँकी बुखार हाथ्युहात मटगी ,व्हा छोखी होगी,फेर व्हा व्हाँकी सेवा -चाकरी करबा लागी। ³² तो उ दन मं दन बुड़यां क पाछॅ ,ऊ जग्ह का लोग, सारा बेमारां न अर ज्यांकॅ भूत लागरिया छा, व वानॅ ऊंकॅ गोड़यां ल्याया। ³³ अर उ नगरी का घणा लोग-दणी बारणा क सामॅ उलट पड़ीया। ³⁴ अर ईसु तरॅ तरॅ का रोगा सुँ बेमार पड़या घणा मनख छोखा कर्या अर घणा मनख्यां मं सुँ भूत खाढ़द्‌या।अर ईसु भूतां क ख'बा काण समय न्ह दियो,क कस्यां भूत ईसु न जाणॅ छा।

³⁵ अर ईसु बड़ा तड़काऊ मं उठ'र घरां सुँ खढ़'र एक सुनी जगह मं जा'र परमेस्वर सुं पराथना करबा लाग्या। ³⁶ पण समोन अर ऊंका साथीडा व्हांनॅ हेरबा खड़ग्या । ³⁷ अर व व्हाँनॅ हेर ल्या अर खी,सारा मनख थांनॅ हेररीयां छां। ³⁸ ई बात न सुण'र ईसु न व्हां सुं खी,”आऔ ल्यो आपण आस-पास क गाँव मं चालां,जिसुं म्हूँ ऊंठी का मनख्यां काण बी छोखी खबर सुणा सकॅुं क कस्यां ईक लेखॅ तो म्हूँ आयो छूं। ³⁹ अर ईसु गलील क सारा इलाका मं यहूदीयां की भेळा होबाळी सभा क घर मं जा'र परमेस्वर की छोखी खबर सुणातो ग्यो अर भूतां न बी खाढ़तो ग्यो ।

⁴⁰ फेर ईसु क गोड़यां एक मनख आयो, जिंकॅ ^‡कोढ़ होरी छी अर ऊ ईसु क आगॅ घोढा टेकर अरज करबा लाग्यो अर खी,” अगर थें छावॅ तो म्हनॅ शुद्ध कर सकॅॅ छ “। ⁴¹ तो ईसु न ऊं प दया आई अर व्हानॅ अपणा हाथ बढा'र ऊंक अड़ा'र खी' म्हूँ छावॅ छूं, “तू छोखा होजाव”। ⁴² अर हात्योहाथ ऊंकी कोढ़ की बेमारी मटगी,अर ऊं बढिया छोखो मजाको होग्यो। ⁴³ फेर ईसु उनॅ जता'र हात्योहाथ खन्नाद्यो। ⁴⁴ अर ईसु न उ सुं खी,”झांक! तू ईं बात क बारा मं कोई सुं कांई बी मत खीज्ये पण याजक क गोड़यां जा'र खुद न दिखाज्ये,अर जस्यां जी बगत पहली मूसा सुं निम मल्या छा अस्यां तू बली चढ़ादीज्ये, ईं सुं सारा मनख जाणॅबा लागॅ जाव, क तु शुद्ध होग्यो। ⁴⁵ पण ऊ छान-मुन रहबा क बदलॅ, बारह जार सारा मनख्यां काण ईं बात न बताबा लाग्यो,क ईसु न कस्यां ऊंक तांई छोखो करदीयो अर सारा जगह मं यो समचार फॅला द्‌या।ई लेखॅ ईसु कोई सहर मं खुल्लम खुल्ला न्ह जा सकॅ्या पण व्ह गांव बस्ती सुं सुनी जगह मं रह'बा लाग्या।पण ऊंठी बी लोग -दणी च्यारूंमेर सुं ऊंकॅ गोड़यां आता रिया।